But waiting: Turn something OLD to NEW

從來都不能在這方面得到滿足，就是衣著，身型不好，沒有名牌 (顯然我不同意將名牌放上身就是美)，通常在早上襯衫的時間，因為選擇又不多，更不是 mix & match 達人，再加上懶，種種因素影響之下，本人經常以頹 look 出街返工 (這是我自創的新名詞，意思是 T 恤牛仔褲，如要帶出頹的 total look 就要加上我那副厚厚的眼鏡就完成了)。

最近突然想試下穿舊野，沒有特別想穿甚麼，只想舊，於是係衣櫃入面拎左阿媽件 80 年代牛仔背心過下癮，點知一係我唔拎黎著，一拎阿媽就同我爭住黎著，激氣 ! 其實想穿舊野好簡單，打開阿爸阿媽衣櫃都大把，不過睇下你敢唔敢穿出街囉，就好似 80 年代的時候每件女人衫都必定有個膊頭墊，照每十年定唔知廿年一個循環 fashion recycle 來計，剛巧輪到早排興的大膊頭衫，我見有時裝店直情將膊墊外置，這些都是 turn something OLD to NEW 的做法，根本潮流興來興去都是果幾樣，但每次都會加些變化，就造成一樣新的東西了。

睇開本新視線，是一本我覺得文字上寫得很好的內地雜誌，只有這本雜誌我看的時候會每粒字都咀嚼，而三月號的題目就是 New Vintage，就講了時下流行的都是舊東西，愈舊就愈新，美的不是物件本身，而是在物件上時間流逝的痕跡。若要與眾人當中爭艷鬥麗，倒不如懷舊更顯得自己突出，不過有一樣東西絕對不要復活，就是喇叭褲，雖然我也經過穿喇叭褲的年代，但係唔希望再見到佢 !

昨日身痕，去了旺角美芝尋寶，我都起碼有兩年無去過，一行入去美芝唔好睇佢咁多野，而且件件都好似與這個時代扯唔上關係，我買的時候是抱住「咁平，買返屋企再慢慢襯，襯到著到出街為止囉」的心態，所以都買左幾件衫。太花哩花碌的衫或裙我不敢買，因為很蝦人著，現在返工都要著深色褲，真係你唔悶我都悶，其實我很想穿五顏六色，因為個人睇落都開心點，唔似得依家由頭黑到落腳，我就在美芝買了這幾件衫，其實揀完都發覺自己又係揀呢幾隻色 :

如果有些心機，偶爾也會配襯一下，咁當然唔會日日都咁做，如果係仲得了 ?

main top all from mei gee

買的都是透透地的質料、雪紡之類的東西，因為我沒有太多打底的衫也是一個問題，同埋到時會唔會著出街也是一個問題，總之就好多問題。左手邊第一件是一件普通的恤衫，因為是粉色所以感覺春夏些少，第二件的黑色雪紡長袖恤衫的袖是泡泡的那種，是我最憎的，我會買只是因為我鍾意黑色加米色的 trimming 邊，看看會不會有辦法改改它變短袖，畢竟我不太喜歡手臂位置在雪紡下露得太多，感覺怪怪及老土。第三件是黑色連身褲容易配襯，第四件是黑色粗裝上衣，穿上後增添不少 rock 味，大家姐說她細個的時候也是這樣穿。

以下是一些「如果得閒就襯衫又影埋相」的相，其實都沒有甚麼特別，但是如果每天放一張自己，我會覺得好孤獨，所以儲多幾個我先啦 ! 其實每天影一張相應該好多人都好難做得耐，我相信只有黎堅惠才有這種耐力，因為她的衫真的每天也不同，好睇得多了，能夠用固定那幾件衫去襯出多種 style 真的很難。