眼睛想旅行

家中有一部俗稱大機的 Nikon 單反，很多朋友都以為是我的，其實是我爸的，接觸這部機是由 IVE 開始有攝影堂開始，那時一聽到有得學影相，心裡已叫好，因為唔需要溫書、唔需要睇住份筆記、唔需要坐定定，有得對住不同的東西，雖然到現在我也會忘記某些 settings，但最鐘意按快門那一下，我當然知道按快門唔係咁容易既事。

最近覺得維持著這樣的生活方式實在太沒意思，好想出外見更多的事物，剛巧 Canon 又推出了最新一輯的廣告，一向也喜歡這類的廣告，人共不是重點，景色才是重點，尤其是那些看後令人「嘩」一聲的，也看得人舒服，只是價錢令人不舒服，但我勁喜歡這些廣告的景物，令我更加想去旅行，不再想去那些充滿銅臭味的大城市，而是一些令人心情能得以放鬆的地方，再用心去拍幾張照，然後跑上山大叫 ! (講笑)

前幾天發現一個重慶的女攝影師 Jolie，去了她的網站看了一下，她拍的照片都不錯，樣子也很好，但更令我叫好的就是她去了很多很美的地方 ! 每一張相個景都好靚好靚睇到好似身在其中咁 ! 我推介給大家的是她去過的地方拍的照 ....... 我不知道是誰幫她拍的照，但感覺好世界，我都不知道在說甚麼了，我只想立即飛奔去愛琴海 !

她的網站 : http://jolie1118.spaces.live.com/default.aspx

就上網看呀看的時候，我突然問阿爸「你本 passport 仲係唔係屋企 ?」「我想睇下你去過幾多地方」不過我咁問黎都多餘，我唔記得 passport 用晒同埋過左期就會掉，以前去過的地方，蓋過不同國家的印都沒有了，剩下的只有叫他慢慢想一想去過甚麼地方了。唔講唔知，我爸其實曾經行船十年，好型呵 ? 至於水手裝呢個問題我一早已經問過了他，是不用穿水手裝的，而我仲問「咁架船呢 ? 其實行黎有咩用」-_- 如此低能的問題睇怕只有我問得出，因為平時睇戲，都好似唔覺得那些船員有野做，只是閒時吹下水玩下啤牌咁，我以為這就是他們的工作，再細問之下原來是大貨船，也就是運貨，原來如此 ......

我爸想一想後，就說出他去過的地方，日本、英國、美國、法國小鎮、阿根廷、荷蘭、巴拿馬運河 (他說只是架船經過，就當去左) 等等 ..... 不能盡錄，最攪笑係佢平時催人去廁所快 D 果時會講日文 ! (我唔知佢係以前學返黎，定係佢睇日劇同埋戲學返黎，仲識講兩三句勁過我) 當一個人坐飛機去你可能覺得無咩特別，有錢便可以去，但如果這是離鄉背井地去工作，搵錢養家的，就覺得整件事很有型。

可能大家會覺得要拋低身邊的事出去走一轉，返黎又好似咩都無又要開始過好似浪費左時間咁，但係去過咁多地方就一定有得著，感受不同國家的風土人情，那些才是最實在的，在香港打死一世工的人是想像不到的。之前同師傅傾開，佢仲叻女，十幾年前返工儲落一筆錢，就辭職同幾個女仔一齊背包歐遊，佢仲要係完全唔識英文都仲敢去，一去就去了三個月，佢話我知去了好多地方，靚到都唔識形容，佢都話趁後生應該出去睇下個世界，而佢仲約定當時去旅行的背包友在六十歲時再去一次歐遊，真係聽到都開心。

其實自己只是這個世界上的一粒微塵，世界很大。