心血來潮

《月滿軒尼詩》的故事發生在灣仔這個光怪陸離的地方 : 新舊交雜、商廈高聳入雲、小學中學俱備、紅燈區夜夜笙歌……而軒尼詩道落在灣仔中間，剛好把這區切成兩半。兩個主角愛蓮 (湯唯飾) 和阿來 (張學友飾)，正是住在這條路的兩旁。二人由互不相識到相遇，到最後深深的走進對方生命裡去，這就譜寫出一個都市愛情故事。

我係戲院睇過 trailer 覺得都應該唔錯，我鐘意湯唯夠真的性格，同埋我比較喜歡一些新舊交雜的地方。同埋近排對得 D 新人多，發覺兩個生活係兩個地方、互不相識的人竟然能夠走埋一齊真係好神奇，即使有某部份人最後又會以「我地係生活係兩個世界既人 !」的藉口去分手，真係自打咀巴，咁究竟係因為 D 乜野先會令到你同佢生活係同一個世界 ? 咁當然我以上講呢段野其實可以好簡單咁用兩個字就可以講得晒，但係呢兩個字咁娘我係唔會講出黎囉。


今日經過檀島茶餐廳就入去食左個茶餐，發覺店內貼了很多張《月滿軒尼詩》的海報，於是就八掛問下店員係咪係度拍攝啦 (其實未問都知應該係啦，如果唔係點會貼咁多張海報係入面) 佢就話係啦係度拍架，仲拍左兩日由晚上七點拍到第二日朝早，仲指埋佢地拍攝時坐的卡位，不過我就無坐到，因為已經俾個日本妹坐左 -_- 有幾個男店員仲中英夾雜咁溝女，整件事都好港式 !

由於我係一個路痴，更係一個港島痴 (即係 ..... 住香港咁都唔識港島 D 路係咪痴線的簡稱)，剛巧經過話去軒尼詩道食野的時候我仲話「好呀 .....」但其實我唔係好知道軒尼詩道係邊，原來就是搭車會經過、有叮叮行的那條路，就好似有次搭地鐵有個嬸嬸問我「請問鵝頸橋應該係邊個站落 ?」果時我當然話「唔好意思我唔係好清楚 ...... 」但係心諗「 鵝頸橋 ? 聽都未聽過 ! 你問我洪水橋係邊度我就答到你 !」但之後先知道又係搭車會經過的一個地方，仲要打小人打到出晒名 ...... 都話香港細得黎又好大，好多地方我都唔知 !

心血來潮又想來個電車河，來一個漫無目的電車河 !