是我選擇了這裡

我第一次認真遊覽這個地方是三年前，即使香港細到粒米的地方，有很多地方我也沒去過，更何況說去外國旅行 ? 倒不如去這些值得去地方認真地看一下還來得好，我發覺身處在這個地方真的很幸運，香港有好多可愛的地方。

那次突然和同學說去那裡行一轉，還特地計劃了行程畫了出來，感覺自己像小學生去旅行般興奮，我很記得那天，因為是某大型時裝快餐店開幕的日子。路線圖我都不太記得，依稀記得那天曾經走過的街就是現在我每天都要經過的街，海味街、也有賣古玩的，還在畢街下留了倩影 ...... 現在這條街我只是每天跟它擦身而過的呀 !

那天我們去到的地方還不太多，但係我已經好鍾意呢個地方。其後再去一次，這次是因為偶然上網看到域多利監獄會開放給公眾，所以就衝著它而去，去到才知道只是開放給團體，但是我們誤打誤撞都撞到入去，荒廢的監獄，在繁忙的都市內顯得更孤獨，係入面好似會聽到一種無聲的恐怖，這次令我記憶更深。

這次之後如果我出開中環都一定會自己行埋上環，寧願提早出門也要行個圈。然後到了政府提出活化古蹟，支持文化活動 ( 的而且確近一兩年的藝術文化活動是多了，還多了藝術家與觀賞的人互動 )，於是我和同學們到了荷里活前警察宿舍睇展覽，本身我都鍾意睇展覽，到了這個地方更鍾意，真係吸一口氣到處都是文化氣息 ( 誇張左少少 )。及後做一份畢業的攝影功課也是在上環取景，我記得因為這份功課我去了中上環幾次，不停行不停行，不論那份功課的結果，我真是太愛上環啦 ...... 如果話我愛上環，不如話我愛古舊的地方還好，因為再對上一份攝影功課也是在一些殘殘舊舊的牛下拍攝，現在那裡都要拆了，很可惜，因為那裡實在太有味道 ( 不是臭，是一種舊獨有的味道 )。

一個咁平靜而又不起眼的小社區，愈行愈神秘，因為會愈行愈發現多地方你仲未行過，就好似發現新大陸咁，不過話係香港發現新大陸講出來會俾人笑喇。直到我做了這份工作，因為我是路痴，初時我只記得公司在中環，因為在一條大直路上，但其實原來已經算係上環，我就係鐘意佢旺中帶靜。如果人地話中環係香港的中心，我會話上環先係心臟，因為所以新的、舊的都會在這裡發現到，係熱鬧的都市中心內則是另一邊天，世外桃園呀 ! ( 唔好笑先，你笑的話，你問下自己有無試過認真咁行一次呢個地方先 ? ) 雖然午飯時間不是多，但係我有時心血來潮好快咁食完飯走去行一轉，我已經係上環我仲可以去邊 ? 我會行樓梯上歌賦街 ( one of my favourite street ! ) 志在吸幾啖氣，換下氣咁囉，平時做野個人會變凡好緊張，黎到呢 D 地方個人會比較放鬆。如果再有少許時間，就會行下附近的舖頭，那些橫街窄巷都收埋唔少好野架。仲有時間剩既話 ? 一個 lunch time 咋咪傻啦，邊去得咁多地方，不過有時如果知道附近有 d 藝術文化活動，我都會去繞個圈。

通常時間關係，都行不到太遠的地方，但最近那套香港電影「歲月神偷」得獎，永利街又被傳媒熱捧，又話係上環，又未去過，所以早幾日為見其真身，又快手快腳行過去睇下。我特地查了地圖才去，永利街就在警察宿舍往上走，城隍街隔離，沿著警察宿舍旁的樓梯行上去時，頭頂就是一棵棵大樹，大到好似大樹好遮蔭那種，真係唔似香港，行到我唔想走 ! 再行上去到永利街，其實只係一條好短的街，但那些唐樓係舊到有露台果種，只有三層左右，睇落真係好似危樓，只有位於最外面的一兩座修葺了，變成穿了新衣的唐樓，總之其他的 ...... 很集體回憶，對我黎講好靚，待別係鬧市中有幾座咁舊的唐樓與身旁的高樓大廈襯托之下顯得更特別。

我去的那天只是平日，但因為佈道過之後都有不少人去那裡拍照留念，我見到最外面放了幾張紙牌，內容大概是說政府又做埋 D 唔應該做既野，好拆唔拆唔應該拆既就拆，要拆的就唔拆，係都拆晒香港人的回憶先安落，我覺得再拆落去，香港就算變得幾靚都係無意思，因為已經無值得留戀的東西 ...... 行左一陣，影左幾張相，發覺其實大家只係影緊人地掛係露台外的內衣褲，實在不好意思打擾別人太多，所以就望多兩眼就走了，但係條街真係好值得去看一下，我反而覺得似電視城內起的街，好有真實感 ( 當然它是真的 )。 這篇原本一早已寫了，這個時候永利街亦已決定保留，不過有好也有不好。

之前看了一篇報導講上環，我對佢講到上環呢個地方好有親切感、好真，十分認同。究竟是我選擇了這裡，還是這裡選擇了我 ? 同時，住在舊區的人都是區內的人情味較濃，好比住在厚厚牆壁相隔的單位，不知隔離鄰社姓甚名誰，事實就是這樣。不過今天出門返工時係個袋度搵野搵極都搵唔到，於是隔離個師奶彈左句「係咪好難搵呢 ? ( 係呀 .... ) 呢 D 袋係咁架啦，咁既間隔係難搵野架啦，如果你搵本硬野攝起個袋呢就易搵野好多囉 ! (哦 .... ) 」都幾 warm 呀，其實簡單一句問候已經令人覺得溫暖 :)