我長大了想 ......

我細細個想做空中小姐係真既。

但係自從我大近視之後，深明上機戴 con 對眼好乾呢個道理，於是我接近放棄了，為何是接近而不是全放棄 ? 因為語文能力所限令我卻步，加上我唔鍾意著制服唔鐘意著薄到透底既絲襪 ! 我淨係鐘意周圍去但係有錢收 !

我細細個喜歡玩洋娃娃係假既。

洋娃娃呢個 term 令人起雞皮，我細個都只係玩過下一兩隻芭比，扭下佢 D 手手腳腳咁，都唔明有咩咁好玩，但係我就有個嗜好就係扮收銀員，自己撕開 D 白紙再駁埋一條長紙再卷落廁紙筒度，一個好玩又易整既收銀單就完成了，然後再攝落個盒仔度就可以好似拎廁紙咁拎佢出黎，再係屋企搵幾樣野擺係度扮賣野，自己買完自己俾錢 (當然自己整埋錢 ) 自己扮嘟機自己出單 ...... 成件事真係好自閉 ! 到我有一年聖誕呀媽買左部玩具蚊型收銀機俾我至開心少少咋，不過最後都係覺得自己整最好玩。

依家諗返起細個都好興玩自閉遊戲，例如自己一個對住牆玩滴滴仔 ( 好彩我無自己一邊滴一邊講野 ) 同埋小學放學係屋企做緊 Copy Book 既時候 ( 當時係播緊卡啦屋企、原振俠呀 something like that，講起原振俠，李嘉欣俾人控制住個木口木面樣依家諗返起真係幾好笑 ) 寫到悶，就會係窗邊大叫「呀 ! 痴線 ~!」( 我諗講果個真係痴痴地線 ... ) 點知又真係有個痴線既人應返我喎，估佢唔到，至於佢應左我 D 咩我就唔係好記得了。

講左咁多，無非都係想講早幾日睇返呢張相既時候，究竟自己依家追求緊既野係咪真係我想要既野 ? 究竟大家口中所講既「理想」又係咪真係心中所想 ? 成日都轉既理想仲係唔係理想 ? 由細到大只有一個理想既人好呀定係到大個左慢慢地搵自己理想既人好呢 ? 究竟理想係慢慢培育定係由周邊環境因素所影響架呢 ? 理想係咪即係你呢一生人入面一定要做到既野呢 ? 咁理想又係咪真係你想就想呢 ? 我好肯定，我呢一刻真係無理想，香港人行屍走肉，有理想有大志的人有幾多 ? 我亦都唔想我既「理想」任由周邊環境因素所影響，覺得呢樣好喎我又想做，人地做得好喎我又想試，試亦無妨，我希望我都能夠試到出黎，而唔係憑空想像出黎，試真 D 亦無壞，有得我試更加好，等我知道咩野先係我杯茶。

所以聽人講我的理想係「做一個出息既人」夠簡單直接，七個字能夠包含晒所有範疇，咁答既人好有深度，唔需要答你將來會做 D 乜，唔洗煩，只需要時間俾自己慢慢摸索。