靈感，到處都有得執

係尋晚，我終於都忍唔住，忍唔住呢間好似野田妹屋企既垃圾屋，一直唔俾人黎我屋企，係有苦衷的，你要知道。

第一件事，我換左床單，當我特登咁提起換床單呢件事，就代表我係有一段時間無換過，我仲係床單下發現了 ...... 係呢度我真係講唔出口，講了實在有失我身份。

第二件事，今日開始執張書桌，一邊聽 YUI B-SIDE Album 一邊執。首先將桌面果埋衫山完全鏟走，都需要一段時間。以前讀中學，我好鐘意將所以細細粒的公仔擺設放晒上面，睇落有幾多擺得幾多。但係依家我反而鐘意簡簡單單，simple is the best 是我的宗旨，我諗為一個無咁亂的地方有助我思考，雖則我極之少係那張書桌前做野，因為無電腦，就係咁簡單。所以我依家佔據了食飯桌的一角來工作，名副其實伸手就掂到野食，連起身都唔洗，前面又有電視，坐足一日唔郁都試過，想唔肥都難。再執走那埋過期雜誌，所有要掉的雜誌我都一定會花時間來翻睇，因為會有好多靈感係入面，有用就會剪下來保存，是很好的做法。

其實我覺得執都唔係一個辦法，之前係咁講話宜家傢俬過我地間房，無錯，係我地，係三姐妹一間房 ...... 十幾廿年啦都，屬於自己既一間房都無。左右各擺一張床，中間條通道都只係夠一個人過，真係肥肥地好似我阿爸咁就要側身行架。我要間好美觀既房呀 ! 依家好有壓迫感呀 !

今日原本我想去游水都無去到，好後悔，真係好後悔 ! 自從 Rio 同我講完「阿畢你個肚腩都幾大喎」之後，( 當自己愈黎愈肥的時候，沒人話你，你仲可以自己安慰自己，但當有人話你肥的時候，你就真係肥了，是事實。) 我依家會做運動大使，一、三、五就游水，二、四就跑步，九點之後唔食野，我真係想瘦返點，少少地五公斤咁係咁易 !